मैं तो प्रीत गुरां संग पाली रे (भजन) - MAI TO PREET GURAN SANG PAALI RE

(9) भजन

मैं तो प्रीत गुरां संग पाली रे ।

कर सोलह सिणगार , आज मिलबा ने चाली रे ।।टेर।।

आज म्हारो भाग जाग्यो , दिन भलो उग आयो ।

सन्मुख जाय मिलूं सतगुरू से , विरह घणो सतायो ।।

अब मैं झांकू नही पिछाड़ी रे ..........।।1।।

शील ओढणी गुरू गम लहंगो , सत की अंगिया पहरी ।

अमरयो चुड़लो हांथा पहरयो , नाम की नथड़ी पहरी ।।

मैं तो ज्ञान को काजल घाली रे ..........।।2।।

शुभ सिन्दूर , चेतन की टींकी , आणन्दी अंगूठी पहरी ।

सोहं पायल बाज रही , सुमरण की बाली पहरी ।।

धीरज हार गला में भारी रे ..........।।3।।

रतनी चूंपा , सुमति नेवर , बाजू बन्ध भक्ति का ।

नेम धर्म की तगड़ी पहरी , मार्ग लिया मुक्ति का ।।

मैं तो आरती थाल सजाली रे ..........।।4।।

“ज्ञानस्वरूप” गुरूजी का मैं , सन्मुख दर्शन पांवा ।

“अशोकराम” शरण सतगुरू की , हरष हरष गुण गांवा ।।

स्वामी ज्ञान का भण्डारी रे ..........।।5।।