साधो भाई अमृत प्याला पीज्यो (भजन) - SADHO BHAI AMRIT PYALA PEEJYO

 

(25) भजन

साधो भाई अमृत प्याला पीज्यो ।

नित सतसंग गुरां सा की कीज्यो , सत वचना में रहीज्यो ।।टेर।।

सतसंग रूपी कामधेनु से , सारा काज बणाज्यो ।

अर्थ , धर्म , और काम , मोक्ष का , सकल पदारथ पाज्यो ।।1।।

कल्प वृक्ष की छाया बैठो , त्रिगुण ताप मिटाज्यो ।

सुख ऊपजैला नितके भारी , निर्भय मौज मनाज्यो ।।2।।

सतसंग गंगा मांही जाकर , सारो मैल छुडाज्यो ।

दशूं दोष काया का छूटे , कंचन होकर आज्यो ।।3।।

“ज्ञानस्वरूप” गुरूजी सागे , अमर पटटा लिखवाज्यो ।

“अशोकराम” अमृत का प्याला , सन्ता में बटवाज्यो ।।4।।